• Breaking News

    Kangmei Lakah I Ram Venghim Rawh - C. Vanlalmawia

    Kumin atan "Kangmei laka fimkhur hapta" (Fire Prevention Week) chu kan lo hmang tan leh ta, a va lawmawm em kan ti dawn nge a va lungchhiat thlak thin em kan ti zawk dawn ? Kangmei laka fimkhurna hunbik hman a ngaih chuan kangmei lakah mitinte kan fimkhur a ngai hle a ni tih chu a hriat mai awm e. Nikum lama kangmei chungchanga Mizoram report tlem lo en ila.

    Kum 2017 ah Mizoramah In 44 a kan laiin kum 2018-ah chuan In 31 chauh a kang a ni. Aizawl khawpuiah In 18 a kang a ni. In 31 kang zing a In 17 chu kang fai vek a ni. Tin, Satellite atanga a landanin nikum 2018 chhung khan Mizoramah kangmei vawi 2096 a chhuak a ni. Mahse, heta tam tak hi chu tlang ram loneih "Lohal" kan tih vanga kang niin a lang. Engpawh nise, a kan chhan chu thil dang dang pawh a ni thei e. A kang hrim hrim hi a pawi a ni mai. Kang lo se, a tha ber. Chu chu kan tum tur lai tak pawh a ni.

    Kangmei chhuak thin hi Changkan loh vang a ni em? :  Ni lo nasa lutuk.  India ram aia ram changkang tak tak USA-ah te, Australia-ah te, Mexico-ah te ram kang avang hian kumtin deuh thaw an buai thin a ni. Hei hi an changkan loh vanga kang an ni lovin a rinawm. Fimkhur loh mai mai vanga kang vak vak thin an nih hmel e. Hei hi ngaihtuah ngun a ngai a ni.

    In kang hi !
     

    a) Electric kalsual vang : Hei hi sawi a tam khawp mai. TV leh chanchinthar velah pawh hian "Kangmei chhuah chhan hi Electric kalsual vang ni a rin a ni !" an ti fo mai. Mahse, heti hian ka ngaihtuah thin engatinge electric hi thal lai kher khera a kalsual nasat bik ? Fur laite hian a kalsual ve thei lo em ni ? te ka ti thin a ni. Electric-a thawk mi pakhat pawhin "In kang a awm apianga Electric kalsual vang a ni, an ti thlazen hi chu ka awih lo tawp mai !" a tih hi ka hria a, a dik viauin ka hria.

    b) Mei tih mit that loh vang :  Vawkchaw chhumna in atang a kangte, Broiler In atang a kangte, Thingpuidawr atang a kangte a ni mai thei e. A kan tanna kha a pawimawh tawh lo, a kang kha a pawi a ni kan tih tawh kha ! Anih chu chu engtinge kan tih ang?

    In tinah electric kan chhi tawh a, a thiam ve a nia an tihte hi fit tir lo ila. A thiam kan hriat chian a lo berah ITI trained certificate nei ngei te hi i fit tir hram hram ang u. Tin, electric bungrua hi a man tlawm ringawt en lovin a tha leh tlo tur chauh hman hram hram tum bawk ila.

    Ram ti kangtu chuan Pathian pawi a sawi a ni :  Kan ngaihtuah ngai em ? Ramhnuai ramngaw te hi tu chhungkua mahin kan enkawl a ni lo. Pathian enkawl a ni, huan lo rama thlai te pawh hi Pathianin a thanlentir vek an ni. Thawk a phit a, an kangral duai duai mai hi chu a uihawmin a vanduaithlak piah lamah Pathian a enkawltu leh neitu pawisawina a ni (Ramchu Lalpa ta a ni.)

    Kangmei laka fimkhur dan tur : Kangmei chhuah duh zual hun hi a rei lo em em thal lai hi a ni ber. Eng dinhmunah pawh ding ila, eng hna pawh thawk ila fimkhurna kan nei tlan hi a pawimawh em em a ni. Fimkhur loh avangin thil pawi tak a thleng thei tih i hre reng ang u. Ramhnuaiah a ni emaw Inah a ni emaw meimit lovin kalsan lo ang u. Ran chaw chhumna Ina mei leh electric te fimkhur ila, naupangte pawh chah fo thin ang u. Fimkhurna hian chhiatna tur tam tak lakah min humhim thei a ni tih hria ila, fimkhurna hian Nunna hial a chhanhim thei a ni tih i hre thar leh teh ang u.

    Kumin chu Kangmei chhuah lohna khua leh District, Ram tikang lo khua leh District nih i tum teh ang u. Kan zavaiin naupangte huam vekin kangmei chhuak lo turin i fimkhur ang u. Kangmei chhuak tur ven hi Forest deptt-te tih mai tur a ni bik lo a Mipuiten kan zavaia kan mawhphurhna a ni tih i hre thar teh ang u. Kangmei tichhuak lo la, ram tikang lo la Pathian i chawimawi dawn a lo ni reng mai. Mei chu a lin det det laiin tihlum nghal rawh tichuan sum tam tak leh nunna i chhanhim a ni ang. Nang leh kei hian mi Tuitla kan chhan thei lo anih pawhin mi kangtur chu kan chhanhim thei asin le ! Mi thlarau i chhandam thei lo anih pawhin Kangmei laka mi chu i chhanhim thei e.

    No comments

    Post Top Ad

    Post Bottom Ad