• Breaking News

    Kan tih ve tur a ni

    Kum tam tak kalta ah khan kan khua-ah Minister a lokal a; VC ten Minister hmuahna-a mipui kal khawm turin an puang a. Mahse khami tum khan mipui an kal mang lo. Minister hmuah kha thalo an ti pawh a ni lo a; tel ve tumna an nei lo mai chauh a ni. Khawtlang hruaitute an zak hle a. Hrehawm an ti viau bawk.

    Mipui kal khawm a ngaih chang hian ngaih pawimawh a; tel ve tumna kan nei mang lo hi a pawi hle. VC leh NGO hruaitu pawimawh kan nih loh phei chuan kan rilru a luah thuk lo hle a ni. Hmanni lawkah Mizo mipui tana thil pawi tak thleng thei thil Citizenship Amendment Bill duh lohna kawng zawh huaihawt a ni a. Khami tum pawh khan mipui an tlem hle tawh a. Kha Bill kha tumahin kan duh lo vek a; mahse duh lantirna kawngzawh ah erawh tel tumna kan nei lo a. Kan tih ve tur niin kan ngai lo a ni ang.

    Vawiin ah pawh hian VC leh NGO te kal khawm chuan Tuitun tui a thianghlim-a; humhim anih theih nan kawng zawh a huaihawt leh dawn a. Mi zawng zawng hian kan tel ve na tur a ni tih hria ila a duhawm hle.  Tuitun tui hi kan ei lai a ni a; humhalh duh lo kan awm lo ang a; tih thianghlim duh lo pawh kan awm lo ang. Mahse chet chhuah ngaih hun a lo thlen hian ‘kan tih ve tur a ni’ tih nachang kan hre tur a ni a. Tel ngei tum pawh a tha.

    Thil thleng tawh lam han thlir zui ila. Mipui kalkhawm a tul huna kal khawm tur awm mang loh chang a awm thin. NGO ten programme an huaihawt a; mipui an sawm a. VC ten thil pawimawh ah kal khawm tur thu an puang a. Pun khawm nachhan kha mi zawng zawng nghawng thei thil tur anih chuan tel ve hram tum a pawimawh hle. Mipui nghawng lem lo thil anih chuan min sawm ve mahse thu dangah a dah theih.

    Dik tak chuan tu ten emaw lo huaihawt se tha kan ti a. Kan sawisel lem lo. Mahse chu huna kan tel ve theih nan kan hna emaw, kan chhungkaw inrelbawlna lam emaw siam rem kan tum chuang lo a. Midang ten lo ti se ti niawm takin hre lo ang maiin kan awm thin.

    Hetiang hun-ah tak hian mipui kan pawimawh a ni. Chhungkaw member zawng zawng kan tel vek thei lo anih pawhin chhungkua atangin pakhat tal tel tum ila; chu chu mipui kal khawm a ni tawh a. Khawtlang a nghawng tawh thin.

    Ngaihtuah chiang teh ang u. Keimahni ngei pawhin kan tana pawimawh leh tul thil-ah chuan midang tih atana dah mai lovin tel ve ngei tum ila. ‘Kan tih ve tur a ni’ tih ngaihdan nei ila. Chu chuan rah duhawm tak a chhuah ang.

    No comments

    Post Top Ad

    Post Bottom Ad