• Breaking News

    India leh Pakistan inkar boruak a lum tual tual, boruak kal zel thlirna

    Pakistan-a hmun nei firfiakten CRPF sipai an lambun a, bomb hmanga an beih a, 40 aia tam an thah avanga India phuba lakna chuan nghawng a nei lian chho zel a. Nimin khan khawvel puma media-te thupui ber chu India leh Pakistan inkar a ni.

    India-in Pakistan awp Kashmir-a helho camp-te bomb hmanga a beihn avangin Pakistan chuan nimin khan Islamabad-a India Acting High Commis -sioner ni lai Gaurav Ahluwalia chu an ko a, India-in inkahhai thuthlung a bawhchhia chu na takin an dem tih an hrilh a. India bomb thlak avang hian helho bakah civil mi 4 an thi tel tih an sawi bawk.

    Niminpiaha India-in bomb a thlakah hian civil mi 4 an thi a, thi zingah hian hmeichhia pathum an tel niin Director General (South Asia and SAARC) Moha-mmad Faisal, Pakistan foreign ministry spokes-man ni bawk chuan a sawi.

    Nimin khan Pakistan indo thlawhna te chu India awp Kashmir-ah an rawn thlawk lut a. India chuan heng Pakistan thlawhna te hnawt kiang tur hian MiG 21 indo thlawhna paruk a tir chhuak a, heng zinga 5-te hi him takin anrawn kir leh a, mahse, thlawhna pakhat leh pilot pakhat chu a awmna chin hriat a ni lo.

    India indo thlawhna pilot chin hriat lohva awm mek hi IAF pilot Wing Commander Abhinandan niin, MiG 21 Bison a khalh a, tunah hian a awmna chin an hriat loh thu MEA spokesperson Raveesh Kumar chuan a sawi a. Pakistan chuan an man niin an sawi a, hei hi India official-te chuan an la finfiah rih lo a ni.

    Kumar chuan, “JeM-te hian India sipaite beih leh vak an tum tih kan hriat avangin an camp kan bei a, kan chhut chhiatsak a. Mahse, hei hi Pakistan chuan an lo tawrhpui a, India ram chhunga sipaite hmun tihchhiat tumin an rawn thawk ve leh ta a. Mahse, IAF-te chuan lo chhang let nghal vatin, Pakistan indo thlawhna pakhat chu kah thlak a ni a, PAF jet tla lai hi LoC a kan sipai awmten an hmu chiang hle a ni,” a ti.

    Hetih lai hian nimin khan Pakistan chuan India thlawhna pahnih an kah thlak thu leh pilot pakhat an man thu an sawi a. Mahse, hei hi India chuan thu dik lo a nih thu an sawi ve thung a. India indo thlawhna pakhat mah kah thlak a ni lo an ti ve thung.

    Hetih lai hian IAF chuan Pakistan indo thlawhna, F-16 chu Lam Valley, Jammu and Kashmir-a Nowshera sector-ah an kap thla tih an sawi ve thung a. Pakistan hian indo thlawhna pathum chu Line of Control pelin an rawn tir a. India-in an kah thlak thlawhna a\ang hian a pilot chu parachute hmangin a zuang thla niin an sawi ve thung.

    India leh Pakistan thlawhna sipaite hi boruak ah an inchai viau niin sawi a ni bawk a. Hetih lai hian Pakistan Prime Minister Imran Khan chuan India leh Pakistan chu tuna buaina chungchang sawi fel tur hian inbiakna neih a duh thu a sawi a. Mahse, hel leh firfiak lam a sawi tel loh avangin India official-te an lungawi chiah lo ni-a sawi a ni bawk.

    No comments

    Post Top Ad

    Post Bottom Ad