• Breaking News

    Huan thlai bo - Chhuahtlang Editorial

    Tun hma deuh khan Huan thlai bo chungchang hian khaw chhunga Zau Association te; Huan neitute rilru a tina thin a. Mi thenkhat phei chuan thubuai an theh lut a; Misual man chhuah te pawh hrem an ni fo.

    Mahse Huan thlai bo chungchang hi a reh thei chuang lo. Zawngtah awm hun laiin Zawngtah a bo a; Kuhva rah a bo a; Panhnah a bo a; Sawhthing thlengin thil man to leh hralh nuam apiang a bo mai hi a mak ta hle a ni.

    Huan thlai ruk lo leisak chungchang ah hian sumdawng leh Bazar-a inzuar te hi midang zawng aiin an pawimawh lawt lak a ni. Kuhva pum, Panhnah leh Zawngtah te; Sawhthing te hi zuar chhawng tur ten lo lei sak ta lo sela; misual rukru ten an ru fo peih lo ang.

    Bazar Nu zingah pawh hian man tlawm zawka lei theih anih chuan Huan nei ngai miah lo; hralh chhuah khawp pawh thar chhuak lo tih an hriat sak te hnen atanga lei chhawng hreh lo an awm tlat a. Hei hian Huan thlai bo hi a titlem thei lo a ni. Anmahni insawina ah ‘Ruk a nih leh nih loh kan hre lo’ timahse a zuartu leh a neitu atang te; a man (rate) atang te hian rinhlelh tur chi hi chu an awm ngei a ni. Chutiang mi te chu leisak miah lo sela tun ai hian a ziaawm ngei ang.

    Hei bakah hian Police Deptt an pawimawh bawk. India Dan chuan thil ruk hralhtu leh leisaktu chu Dan hmanga hrem theih turin a dah a. Huan thlai rutu man anih chang hian a leitu zawng nen thubuai siam sak vek sela tun ai chuan a tlem deuh ngeiin a rinawm bawk. Kum 3 kalta ah khan Kolasib ah pawh rukru thil hralh lo leisaktu te chu Police ten manin thubuai an siam sak thin a; chutiang anih avang chuan mipui pawh an inveng a; thil ruk a tlem phah tawh a ni.

    Mizoram khaw pakhatah YMA in Huan thlai bo tih tlem dan tur a ngaihtuah a; a ropui hle. Eng ang pawhin thawk nasa ila, rukru thil zawrh leisak kan hnial loh chhung chuan a tlem tak tak chuang lo ang.

    Chuvangin misual te thil ruk reng reng chu tumahin leisak lo ila. Thiam inchantir nan ‘ruk a nih leh nih loh hriat loh’ lam sawi lo ila. Midik takte thil zawrh chu kan hre mai a. Mipui fimkhur ila; kan titlem thei maiin a rinawm.

    No comments

    Post Top Ad

    Post Bottom Ad