• Breaking News

    Exam a hnai - Chhuahtlang Editorial


    Zirlaite kum tawp Exam a hnai leh viau tawh a. Zirna School zawng zawng te chuan Exam turin an Zirlaite an buatsaih mek tawh a; Exam huna an thiam loh hlauhna avangin theih tawp an chhuah a ni. Tun ang hunah chuan Zirtirtu te hi an thiam loh hrilhtu leh zirtirtu an la ni a; zirlaiten an thiam theih nana buaipuitu an ni bawk a. Mahse Exam hun a lo thlen tawh chuan Zirtirtu an ni tawh lo a; Exam endiktu leh vengtu an ni tawh zawk a; thiam loh hrilhtu an ni tawh lo. Exam hunah chuan zirlaiten an thiam emaw thiam lo emaw-ah Zirtirtu tan tan lak pui a rem tawh lo thin a ni.


    Tun lai hun hi Zirlaite tan a pawimawh a; Zirtirtu te thu an awih that ber hun lai tur a nih bakah nasa taka lehkha an zir hun tur a ni ang. Zirtirtute chuan an tih tur an ti zo lek lek tawh a; hun tlemte chauh an nei tawh. Chubak chu Zirlaite leh Nu leh Pa kutah a awm tawh ang.


    Nu leh Pa thenkhat chuan an fa te Exam tura inbuatsaihna hi an vei nep hle. An thiam leh thiam loh pawh an ngaihtuah ngai lem lo a; an zirlai an enpui ngai lem lo bawk a. Zir tura an hrilh bakah eng mah an tihpui lem lo a ni. Result a lo chhuak a, result tha an neih loh chuan Zirtirtu lam an dem let daih a; chu chu tih dan tur dik a ni lo.

    Tunah hian Nu leh Pa ten Zirlaite ngaihven ila; an zir tur hriatpui bawk ila; an zir chhungin tawiawm bawk ila. An notebook leh lehkhabu-ah thil chiang tawk lo awm anih chuan Zirtirtu te biak rawn hun lai a ni bawk. Mi thenkhat chuan an fate zirlai pawh an hmuhpui lem lo a; School lama Zirtirtu ten zir tur an pek pawh an hriatpui hek lo. Chutiang chhungkua ah chuan naupang thiam thei an chhuak khat khawp mai.

    Zirlai thenkhat chuan kar leh mai ah hian Exam an tan dawn a. Thlaleh maia Exam tan tur an awm bawk a; tan lak hunlai tak a ni.

    Hetiang hun pawimawh ah hian chhungkua pawhin In chhungah zirna boruak kan siam thiam a pawimawh hle. Lehkha zirna room hrang neilo hi a tam zawk kan ni a. Khawilai hmun pawh hi lehkha zirna room angin a siam theih a ni. Nu leh pa ten zirna kan tuipui chuan naupang chuan an tui chawp mai ang.

    Exam a hnai a; rilru sen hun lai a ni a. Thawhrim hun lai a ni bawk. Thil dang pawimawh chu hun danga tih theih anih chuan kan rilru zawng zawngin Zirna lam i hawi teh ang u.

    No comments

    Post Top Ad

    Post Bottom Ad