• Breaking News

    ENGTIA LO VALENTINE’S DAY NGAWT NGE...? - Kapliana Pachuau, Serchhip


    Valentine’s Day han tih mai hi chuan a Khawvel hmel vek vawk viau mai a, a Romantic bawk a, a chin chhuak a han chhui tak tak phei chuan he Valentine’s Day hi a Kristian ruih ti te pawhin a sawi theih hial awm e! Valentine’s Day leh Kristianna hian inzawmna thuk tak a lo nei reng mai a lo ni a. Tin, a lo chhuahdan pawh hi a rei tawh em avangin Upa in “Khual thuthang leh Ar pan chuk” an lo tih ang deuh khan a darhsarh nuaih tawh a, Khawvel in tun dinhmuna a pawm tak bera lang chu hetiang hi a ni!

    Rom sorkar ropui vanglai...
        Khawvel History a Kristian te tihduhdahna nasa ber thlentu chu Rom Lal Nero-a kha a ni awm e. AD 41-na leh 54-na inkar chhung zawng khan Rom ramah a Lal a, khatih lai khan Rom sorkar chu tunlaia Supper Power kan tih mai USA kan tih ang khu an ni a, USA ram ai pawh khuan a hunlai na na na chuan an ropui zawk ti ila kan uar lutuk a ni kher lovang. Khawvel hi an duhdan danin an thlektir a, an lak duh ram apiang an la bawrh bawrh a, British ho ang deuh khan an ram lak apiang thiam takin an awp zui zel a, chung an ram lak te atang chuan chhiah tam tak tak an la a, an duh zat zat Sal atan an chhawr a, an ropui em em a, Mizo pipu te hunlaia Sailo Lal hovin an inngaih ropui em em ang deuh khan an chungah hian Ni leh thla bak leng theiin an hre lo reng reng mai a, Kaisara lo chu Lal dang kan nei lo an ti tawp mai a, chuvang chuan Pathian pawh an siamchawp bak biak an tum lo reng reng a, chu chu Kristian te rindan nen a inmil theih loh avangin tihduhdah an tuar ta... a ni ber!

    Rom Lal nunrawng Nero-a
        Kristian tiduhdahtu te zinga hming langsar tak pakhat chu Nero-a a ni kan tih kha. A hming tak chu Tiberius Claudius Drusus Nero Germanicus a ni a, Tiberius ti te, Emperor Claudisu-II ti te in an lam bawk a, mahse kan hriat lar dan ber zawngin Rome Lal Nero-a kan ti zel mai ang. Quovadis bu leh Film an te pawh kan hmu fova, BC 10 khan France chhimchhak lam Lugdunum khua, tuna Lyons an tih takah a lo piang a, a pa chu Drusas Nero a ni a, a pu(a pa pa) chu Rome Lal Tiberius an tih thin kha a ni a, nupui pahnih a nei a, Mesalina leh Agrippina the Younger te an ni. A nupui te pawh hian an hmangaih vang a nei ni lovin an hlauh neih zawk a ni maithei! Agrippina zawk hian Nero kha turin a hrai hlum hial niin Rome mi Historian hmingthang tak Publius Cornelius Tacitus chuan a ziak.

    Kristian tihduhdahna a intan
        Sawi tawh ang khan Nero-a hunlai hian Kristian ten tihduhdahna an tuar nasa em em a, Rom khawpui dinthar leh a duh a, an kawngpui zauh te, an khaw kawng chhe lutuk siamthat ve te pawh a duh ve a niang, mahse khang hunlaia Rom mi zingah khan a nek per mai mai ngam loh tam tak an awm si a, chuvang chuan a rukin zanah a hal ta hluah hluah mai a, Rom mipui an thinrim a, a hlau leh lawi si a, Kristian ho tihah a puh a, inthennan a tiduhdah ta chiam chiam mai a, Tirhkoh Paula te, Petera te ho pawh kha Nero-a hunlaia Martara thi nia hriat a ni.

    Ropuina um vangin Nupui pasal neih a khap ta
        Khawvel ram hrang hrang a sorkar chak tak tak dang awm ve te tukdawl a, awp bet zel tur chuan sipai rual leh ralthuam neih that a pawimawh khawp mai a. Nero-a pawh khan chu chu hre rengin Rom mi, thalai tawh phawt chu nupui pasal nei hman lek lova sipaia tan luihtir a, ral rama tirhluhna tur thupek hial a lo siam ta a,  chutihlai chuan nula leh tlangval te zingah inhmangaih tak tak, inhmuh loh hleka darkar khat pawh kum sangkhat tluk hiala ngai hman te pawh tam tak an lo awm ve a ni maithei. Chutiang mite tan chuan Ral rama han inkalsan a, thi leh dam kara ring va rawlh chu thil harsa tak a ni ang tih a rin theih. Tichuan...Nero-a chuan thupek khauh tak chhuahin Rom mi, tupawh nupui pasal neih a khap ta bur mai a. Mipa, thalai tawh phawt chu sipaia tanga ral rama kal vek turin thupek a chhuah ta a, tlangval tam tak an mangang a, nula tam tak lungngaiin an tah a lo ngai ta!

    St.Valentine a lo lang ta
        Mahse Pathianin mihring te min siamdan phungah hian manganna nasa tak kan chunga a lo thlen pawhin eng kawng zawng emaw tal chuan chuta ta talchhuahna kawng chu min hawnsak zel thin a lo ni a. Rom nula leh tlangval, inneih ngei tum a, fanau maltluan chawia hmalam hun eng taka lo thlir thintu, an Lal duham vanga lungngaihna khura tlulut a, mangang taka rum mek te tan pawh hlimna kawl eng a rawn zam a, chutihlaia Roman sakhaw Puithiam St.Valentine-a an tih chuan thih pawh hlau lovin Rom Lal Nero-a thupek ai chuan chunglam Pathian thupek awiha, chi tam taka inthlahpung a, leilung luahkhat tura nula leh tlangval inhmangaih ngawih ngawih te inneihtir chu a lo thlang ta zawk a, tichuan nula leh tlangval tam tak a rukin a inneihtir a, nula leh tlangval, inhmangaih ngawih ngawih te tan chuan a hlu vawng vawng ngawt ang le!!

    Nero-a’n St.Valentine a lu a tan ta
        Chutah, hlauhthawn ang nge nge in Nero-a’n a lo hria a, Rip(Tan in thim tak) chhungah a khung ta hmiah mai a, tan in thim tak chhungah pawh chuan nula leh tlangval, inhmangaih ngawih ngawih, a ruka rawn pan tang tang te chu a la inneih luihtir leh zel a, chu chu Lal Nunrawng hmingthang Nero-a’n a lo hriat chuan a dawhtheihna in a tlin ta lova, Feb. ni 14 (a kum chiah History lamah pawh rinthu mai lochuan chhuichhuah ngaihna a awm chiah tawh lova), vawiin angah hian hmangaihna ngah, inhmangaih te hlim taka an lendun theihna tura thih pawh huama inpe thintu Lu chu rawng takin a tantir ta a ni.

        St.Valentine hi Doctor a nih tel bawk avangin a lu tan a nih hma lawk hian tanin vengtu fanu mitdel mit pawh a tihvarsak nghe nghe a, chu naupang hnenah chuan a thih hma chiah hian lehkhathawn a hnutchhiah a, tah chuan “From Your Valentine” tih hi a lo inziak nghe nghe a ni!

    Valentine’s Day a lo piang a...
        Heti taka hmangaihna ngah, inhmangaih te tana a nunna hial hlantu Mithianghlim Valentine-a hi Rom mipui tam takin an ngaisangin an ui em em a, AD 496 a lo herchhuah meuh chuan Khawvel puma Roman Catholic hotu lu ber Pope Gelasius-I chuan a thih cham Feb. ni 14 chiah ah Valentine-a chu mithianghlim - Saint ah puangin amah hriatreng nan Kut ropui tak a buatsaih ta a, chu ta tang chuan kumtin he Inhmangaihna Kut an tih mai - Valentine’s Day hi hman a lo ni ta a. Hun a lokal zel a, Khawvel ram hrang hranga hnam hrang hrang, Valentine’s Day lo chhuahdan leh nihphung hria apiang te pawhin urhsun takin an lo hmang chhunzawm ve ta zel a ni.

    Valentine’s Day hi Engtia hman tur nge?
        Valentine’s Day ah hian inhmangaihna tilang tha ngam mang lo ten tihlanna hunah an hmang a, mi tam takin hemi ni a inneih hi a malsawm bikin an ring a, chuvang chuan thenkhat a hu hovin an innei a, kan sawi chak em em, kan sawi ngam chiah si loh sawichhuahna hun atan te pawh mi tam tak chuan an lo hmang fo thin a, nula leh tlangval inkarah mai pawh nilo, nupa karah, nu leh pa te leh fate inkarah te thlengin inhmangaihna tih thar lehnan te an hmang thin a, thenkhat dang leh chuan midang te tana thil tha tihna hun atan hial te pawh an hmang tawh a, an entawntlak hle. Kumin Valentine’s Day pual hian Mizotam hmun hrang hrangah pawh mi tlawmngai ten a thlawna Thisen pek runpui an buatsaih leh dawn nghe nghe a, Valentine’s day an ti hlu zual hle a ni. Valentine’s Day hman nuam vek ule...!

    No comments

    Post Top Ad

    Post Bottom Ad