Drama Competition, School timing, E-Roll, etc.

Drama Competition
Nimin khan Paris Hall, Kolasib-ah UD&PA Department, Kolasib bultumin Swachh Bharat Mission (Urban) hnuaiah Kohhran Thalai Pawl tan faina chungchang Drama Competition a buatsaih.

He hunah hian Kohhran Thalai pawl paruk an tel a, Lawmman pakhatna dawngtu hi Hosea Group, KTP Diakkawn Branch chuan Rs. 30000/- an dawng a, pahnihna KTP College veng Branch-in Rs. 20000/- dawngin pathumna SAY, Diakkawn ten Rs. 10000/- an dawng a ni. Lawmman tin hian Certificate a keng tel a, Nl. Shalom Zorinpuii chu Best Actress-ah  thlan a ni. Tel zawng zawng hian participation price Rs. 5000/- leh certificate an dawng vek  bawk.


School  tan  hun  dar  9:00
Mizoram Sawrkar, Education Deptt Secretary chuan School Session thar atang chuan zing dar 9:00 ah School tan tawh tur anih thu hriattirna a tichhuak ta a. Primary School te chu chawhnu dar 2:00 ah an bang ang a; Middle School te chu dar 3:00 ah an bang ang a; High School leh Higher Secondary School te chu dar 3:30 ah an bang thung ang. Sawrkar thuchhuah ah chuan Primary School te chuan nitin darkar 4 chhung Classroom-a zirtirna an dawng a; Middle School te chuan darkar 5 chhung zirtirna an dawng ang a; High School chin chung lam chuan darkar 5:30 zirtirna an dawng ang a ti.
    He hriattirna hi Sawrkar School, Deficit leh Adhoc Aided School te chuan zawm vek turin a ti a; remchan zawkna avanga 8:30 a School tan duh zawk te chuan Education hotute hnenah phalna lak tur a ni a ti.


Roll-a  luh  dil  Bru  2612
Nimin khan Kanhmun ah Bru Transit Camp-a awm mek mi 2612 ten Electoral Roll-a thun luh an dilna ngaihtuahin Hearing neih a ni a. Hearing hi nei lo turin Kolasib NGO Coordination Committee te; Langkaih Group YMA leh Zawlnuam MZP te chuan Officials te an ngen a. Mahse Hearing hi neih zawh a ni ta tho a ni.
    NGO Coordination Committee hruaitute chuan Bru Transit Camp-a awm mek, Electoral Roll-a lut tawh te chu paih turin Objection siam a ni a; mahse ECI chuan a hlawma dilna (bulk application) a ni tiin a hnawl a. Chutiang chiah chuan tuna Bru Camp-a awm te pawh hian a hlawm tho in an dil a; bulk application tho a ni an ti. NGO te hian hetiang hian ti mahse DC atangin Hearing kaltlangpui tura nawrna a awm nia sawiin Hearing hi neih a ni an ti.
    A hmuna kal te chuan Roll-a luh diltu zingah hian document awm mumal lo te; Nu leh Pa hming hre lo te; kum zat sawi dik thei lo te pawh an tam hle niin an sawi. An zingah hian Kolasib District Constituency 3 atangin mi 459 an tel a ni.


Inthuam  tam  lo
GAD Commissioner / Secretary in Chapchar Kut denchhena Mizorama Sawrkar hnathawk zawng zawng tunkar Thawhtanni atanga Mizo thuamhnaw hmang-a Pisa kai tura hriattirna a chhuah chuan Kawnpui-ah zawm a hlawh lo hle a. Thawhtanni leh nimin Thawhlehni khan Sawrkar hnathawk zingah Mizo Traditional Dress hmanga Pisa kai hmuh tur an awm mang lo.