• Breaking News

    Dam laia inthlamuan - Article

    Mi tam zawk hi chu kan mak ve khawp a; kan thih thu Social Media vela tih chhuah anih atang chiah hian kan inngaihvan tan emaw tih tur a ni. Kan dam loh leh natna kan tawrh lai te chuan mi tumah hian eng he hu ah an ngai vak lo a ang. Thih hlauhawm khawpa kan natzual thu hriat anih hian rilru a luh tan deuh chauh a ni mai thei.

    Thih tawh hnu-ah Pathian awmpuina kan duh sak thu te kan sawi a; Pathian Thlamuanna kan dil sak bawk a; kan uizia leh pawi kan tihzia te kan sawi a. A tuartu chhungkua tana thlamuanna thu kan sawi bawk a. A lawmawm em em a. A hlu viau ang.

    Mahse thil pakhat ngaihtuah hmaih kan nei. Damlo chu a dam loh lai khan tanpui leh thlamuan a ngai a; a chhungte mangang leh rilru hah pawh thlamuan an ngai a. Chutiang tur chuan an chenna hmuna kal chilh a ngai a ni.

    Chhungkaw thenkhat chuan insuk sak an mamawh mai thei a; thenkhat chuan damlo tak tak va enkawlpui an mamawh thei a; thenkhat chuan ei rawngbawl sak pawh an mamawh thei a; thenkhat chuan In leh a vel tihfai sak pawh an mamawh thei a. Thenkhat chu ti ti pui a, tihhlim mamawh tak pawh an awm thei ang. Mitin leh chhungkaw tinin kan mamawh dan a inchen vek lo ang a; a inang vek hek lo ang. Chutianga an mamawhna zawn theuh a chet kan lak chuan an tan thlamuanna a ni.

    Thih tawh hnu-ah Whatsapp leh Facebook vel kal tlanga inthlamuan tum hi chu chhawrna a tlem khawp mai. A daih rei lem lo bawk a; tuartu pawhin a thlamuan phah in a rinawm chuang loh.

    Kan thlamuan duh tak tak anih chuan a hmun-ah va kal ila; ralkhat atang nilovin. An kawtlai leh In chhung ah ngei ka awm ila, an tana tihsak ngai leh tih sak theih kan neih tur chi va zawng chawp ila, min tirh vanga ti lovin. An chetna lam apiangah chetpui ila, an tih ang apiang tihpui ta ila kan thlamuan ber maiin a rinawm.

    Mi an thih tawh hnu-a thlamuanna indilsak leh Pathian awmpuina indilsak hi a hlu em em a; chu ai mah chuan an thih hma atangin keimahni ngeiin Mobile Phone nilovin an awmna hmun ngeiah kan chetzia in an thlamuanna tur va tihsak ila a hlu daih zawk ang. Hei hi kan hriat fuh loh deuh chu a ni.

    No comments

    Post Top Ad

    Post Bottom Ad