• Breaking News

    Australian Open champion thar leh world number one thar - Osaka

    Japan nula Naomi Osaka chuan Czech nula Petra Kvitova chu Australian Open final hmuhnawm takah hnehin a champion a. Grand Slam tournament hnuhnung pahnihah a champion ta a. World number one thar a ni ta bawk.

    US Open champion lai, kum 21-a upa Osaka hian set hnihnaah champion -ship point vawi 3 a nei a, a hmang tangkai thei lo vek a, set hnihna chu a hloh zui a. Mahse, set thumnaah a thiam zawk a ni tih lantir nawn leh ngatin, 7-6 (7-2) 5-7 6-4 in hnehna a chang leh ta tho a ni.
    Kum 28-a upa Kvitova hi Grand Slam-a vawi hnih champion ve tawh tho ni mah se, chemtea vih a nih avangin tennis a khel thei lo reng a. Amah chuan inkhel thei tawh lo mai tura a inngaih hnuah rawn inkhel lehin, Grand Slam final hial a thleng leh ta a ni.

    Champion trophy a dawn hnua a thusawiah Osaka chuan, “Mipui hmaa thusawi hi ka chak lohna a ni a,” a ti te te a. A tawpah, “Note pawh ka chhair ve vek a, mahse, sawi tur pawh ka theinghilh leh a ni. Final ka khel thei hi ka lawm a ni,” tiin a thusawi a titawp.

    Wimbledon-a vawi hnih champion tawh Kvitova chuan Kum 2016 December thlaa chemtea an vih hnua Grand Slam tournament final a thleng leh thei chu lawmawm a tih thu a sawi a. Set khatna a hloh hnuah set hnihnaah match point vawi 3 a dan chah hnuah 5-5 in Osaka a um pha a, a zawnin point 12 a hmu leh a, set hnihna a la a. Hetah hian Osaka chu a insum zo lo va, a mittui a tla zung zung. Set thumna an khelh leh hmain Osaka chu bathroom lamah a kal a, a rawn chhuak leh chu mi danglam a ni tawh a. Set thumna chu 6-4 in a rawn la a, American Jennifer Capriati’n 2001 a a tih angin, Grand Slam-a a champion hmasak ber hnua Grand Slam tournament awm leh hmasa berah a champion leh thei a ni.

    Osaka hian kar 48 chhung zet world number one lo ni tawh Romania nula Simona Halep chu lehpelin world number one a ni ta a. Asian playr zinga tennis world number one ni thei hmasa ber a ni a, Denmark nula Caroline Wozniacki hnua world number one ni thei naupang ber a ni bawk.

    Osaka hian US Open-ah khan final-ah Serena Williams hnehin a cham-pion a. Khami tum khan Serena kha umpire nen an inau hrep a, Osaka cham-pion ai mahin a lar a. Aus-tralian Open-ah erawh a boruak a danglam ta.

    Kvitova pawh a lawm-puiawm tho. Pahnihna a ni chu pawi a ti a, mahse, lungchhe takin chemte hmanga beih a nih a sawi lang a, a hmasawnnaah lawmawm a tih thu a sawi.

    No comments

    Post Top Ad

    Post Bottom Ad