• Breaking News

    Chapchar Kût

    Zirtawpni ah khian Mizo ten Chapchar Kut kan hmang dawn. A hun thu-ah erawh hmun thenkhat ah chuan remchan dan azirin sawn hnaih leh sawn hlat a awm a, a tha vek tho. Mahse Sawrkar in Chapchar Kut hman hun tura a ruat chu Zirtawpni a ni.

    Thawkkhat lai khan Chapchar Kut hi Kohhran lam atanga thlirin hnualsuat deuhna a awm thin a; Kohhran mi telna tur awm niin an ngai lo deuh. A chhan chu Mizo ten Kut kan hman dan kha Zu leh Sa te nena inpawlh in, Sahaw ang lek lek kan hmang a; Kut chanchin kan sawi leh ziak ah pawh Kristian tana tel na tur chi-a ngaih loh a awl a ni.

    Mahse tunah chuan Chapchar Kut hi Hnam thil angin kan ngai ta a; a kaihruaitu leh buatsaihtu te pawhin Kristianna nena inmil lo thei thil an zep ngai ta lo. Hei vang hian Kohhran ngaihmawh a ni tawh lo a; Kohhran mi leh Rawngbawltu pawhin Kut kan hmang tlang thei ta a ni.

    Dik taka chhut chuan, Chapchar Kut kalsan aiin chhawm nun zel a tha zawk. Kristian kan nih hma-a Kut kan hman dan thenkhat te kha chu vawiina tih ve kher pawh a ngai lem lo. Ti ve kher lo pawhin Kut kan hmang thei a ni. Kan Hnam thil pawimawh anih tak avang hian Hnam ziarang kan tihlanna hun ah ngai ang.

    Kumin-a Kawnpui-a Chapchar Kut Programme ah phei chuan Hnam lam entir satliah mai ni lo; Mizo pi leh pu ten thil bik anga an lo ngaih thin, mahse vawiin ah thangthar ten kan hriat tawh ngai loh chu entir a ni dawn a; record atan pawh a tha ang. A hming pawh kan hriat tawh loh, kan rilru mitthla-ah pawh awm tir kan thiam loh kha hmuh tur a awm dawn a ni. Hei tak hi kumina Chapchar Kut pawimawh bikna a ni ang.

    Kut-a YMA in an entir tur Kawngpui siam te; Thihthiap ven te; Kuang ur te; Mizawn inchuh te; Sakei lu lam te phei hi chu School Zirlaibu-a chhiar tur inziak bak a taka hmuh tur a awm tawh lo a ni. Heng Mizo nuna thil chhinchhiah bik te hi a thlalak pawh hmuh tum ila, hmuh tur a vang tawh ang. Mahse Kut-ah chuan a takin kan hmu thei dawn a. Kum dang ai chuan Kut danglam tak a ni ang.

    Kum tam tak chhung Chapchar Kut hian Mizote zingah hmun a luah thuk lo hman hial tawh a; Kum 10 kal ta vel atangin Mizo Hnam thil pawimawh anihna Mizoten kan hre chhuak thar leh a; tunah chuan Mizo Programme zinga pawimawh takah kan siam thei leh ta a; a tihzia hle. Ngai hlu zel tur kan ni.

    Kan hun leh tha te pawh seng ila; kan neih sum sen pawh i hreh lo ang u. Eng hunah emaw chuan Sawrkar leh MLA behchhan lo pawhin Kut hi kan la hmang thei ngei ang.

    No comments

    Post Top Ad

    Post Bottom Ad