• Breaking News

    Chapchar Kut a Infiammi chawimawina an hlan tur zingah Kolasib Nula Lalremsiami a tel ve lo!!! - Amawia

    Hockey
    A kamkeuna :-
    February ni 18 a Chief Minister hova Chapchar Kut organising Committee thukhawm chuan kumin March ni 1 a Chapchar Kut hmanna turah Mizo zingah infiamna lama Mizoram tihmingthatute chawimawina ropui hlan an rel a. Footballer Jeje Lalpekhlua bakah Mt. Everest tlang lawnchhuak pahnih David Zohmangaiha leh Lalrintluangi te chawimawi an rel a. Kolasib Nula, India Hockey team a regular taka hmun chang, Hockey khawvel a Tournament lian zawng zawnga India tana khel a; goal lo thun tawh Lalremsiami chu thlan zingah a tel ve lo!!

    An thlante hi :-

    Chapchar Kut Organzing Committee thukhawm hian eng rilru pu in nge Infiammi, Mizoram tihmingthatute hi an thlan ka hre lo a. A thlanna ah kan awm ve miau loh avangin Criteria ah engnge an hman tih pawh ka hre lo. Heng mi 3 chawimawi tur an thlanchhuahte hi an mahni Line ah chuan hlawhtling tak an niin Chawimawi an phu hle theuh.

    Jeje Lalpekhlua hi Mizo Footballer ah chuan a thleng sang ber a tih theih hial ang. India teamah pawh regular takin hmun a chang phak a. Sum lamah pawh a lakluh chu Remsiami lakluh ngaihtuah chuan a tam tham viau bawk. Hmanni lawkah Asian Cup khel turin India hi a tlinpui a.Asian Cup ah hian beisei phak lo mahse Thailand an khelh tumin goal a thun a. India leh a chhehvel ram tena SAAFF Football an khelh thin te pawh India team rinrawl a ni a. Mizo zinga Footballer thleng sang ber a nih piah lamah hian chawimawina hlan hi chu a phu khawp mai.

    Everester pahnih David Zohmangaiha leh Lalrintluangi te hi Mizo mipa leh hmeichhia ah Mt Everest lawnchhuak hmasa te an ni a. A hmasa an ni satliah mai lova, tun thleng hian an mahni bak he tlang lawnchhuak hi Mizo zingah kan la awm leh lo a. Chawimawina hlan hi an phu khawp mai.

    Amak a nĂ¢ :- 
    Chapchar Kut a chawimawina nopui an hlan turte hi a mahni line ah chuan an hlawhtling viau. Hetihrual hian Lalremsiami tluk hian Infiamna khawvelah Mizote min tihmingtha em tih hi ngaihtuah tham a ni.

    Jeje-a hian India hi Football Tournament lian a khelhpui awm chhun chu Asian Cup 2019 kha a ni a. Hetah hian vawi thum khelin goal khat a thun a, 1st round ah an tla a. Sawi nep tur chu a ni hauh loh rualins awi ropui chuk tur a ni hran lo.

    David Zohmangaiha leh Lalrintluangi te hian Mt Everest an lawnchhuah avang hian Infiamna khawvelah miten Mizoram an hmelhriat phahin, Mizo te min ti hming tha em tih hi chu hriatthiam harsa tak a ni. Rinthu mai lo chuan sawi ngaihna a vang khawp mai.

    Hetihlai hian Lalremsiami'n Asian Games a India a thlenpui chinte, kan hria a, Hockey World Cup a india a thlenpui chinte, Youth Olympic a India a thlenpui chinte kan hria. India team pawhin Poster (an team vawrh larna atan an Player tha an hman thin) ah pawh an hman ngat ngat ni phak a ni. Hetiang a ni chunga Chapchar Kut organizing Committee in chawimawina an hlan tur zingah a tel lo hi a mak a. A na bawk.

    Suangtuahna vak vel
    Chapchar Kut organzing Committee in chawimawina an hlan tur an thlan lai hian Chawi mawina dawng turte hi Mizoram a awm remchang tur an dap em ni chu aw tih ngaih tuahna ah a awm tel. Lalrem siami hi Olympic 2020 atana in buatsaihna atan India ram mai nilo, khawvel hmun hrang hrangah an zin kual reng a, Chapchar Kut hman lai hian Mizoram ah a awm theih hmel loh avangin Chawimawina dawng tur hian an thlang lo em ni ang aw tih hi ka suangtuah tel. Tuteemaw hnial hrat laklawh an sawi ang deuhin ‘Mahse’ la ti hram ang. Amah a awm thei dawn lo a nih pawhin a chhungte hnenah tal an hlan thei tho a lawm.
     
    Kolasib kan che dawn em?
    Chapchar Kut a Chawi-mawi tur zingah Kolasib Nula Lalremsiami a tel lo hi ka hriat tirh a tangin a mak ka ti a. Ka ngaihtuah chiang telh telh a, a mak ka ti tulh tulh. An chawimawi turte hi a ni aia an phu zawkna ka hre lo a ni satliah lo a, Remsiami thlen chin thleng tur hian kawng thui tak zawh tur an la nei zawk ni hialin ka hria.

    Kolasib ah pawh Chapchar Kut hi kan hmang ve dawn. Aizawl lama an hmanna ah Remsiami hi an chawimawi lo a nih chuan Kolasib ah kan chawimawi ve mai dawn lo'm ni? Chapchar Kut hmanna atan hian Sum engzahnge an neih ka hre lo. Aizawl lama an chawimawi turte hi engzahnge an pek dawn tih pawh ka hre lo. State a an pek zah em em chu kan pe thei lo a nih pawhin Zaithiam te hnena hla 2/1 an rawn neih avanga kan pek thin zah tal te hi chu kan pe ve thei dawn lo'm ni?

    Chapchar Kut kan hman hian Lam kan thlirin zai kan ngai thla a ni deuh ber mai thin. Programme dang awm ve bawk mahse heng hi a tam ber a ni kum tin. Kumin ah pawh Zaithiam te kan sawm leh nual tura ngaih a ni a. An ni sawmna atan hian sum pawh kan seng leh nual ang. Mipui an ko khawm tam thei a, hei hi thil tih awm tak a nihna lai pawh a awm. Mahse sum kan neih a tam loh a, Remsiami chawi mawina tur sum hi kan nei daih dawn lo a nih chuan Zaithiam hi sawm tlem deuh mai ila; a va tha awm ve. Kan sawmte hi an hla neih zah in pawisa kan pe nge a ni khat ang zawngin tih ka hre lo. A nikhat hun an hman ang zawnga pawisa kan pe a nih tho chuan, hla 2/1 lek sak tir lo hian hla 3/4 pawh sa mai sela. Sawm man te pawh an awm deuh nge nge ang chu.........

    A tawpna atan 
    Kan khaw nula, kan nau hi khaw dangin an chawimawi thei lo a nih pawhin a  khua te hi chuan kan chawimawi thei dawn lo’m ni? Kolasib a Chapchar Kut organzing Committee lam te pawh hian rua hmanna an siam turah ngai ila. A chenna khua  amite ngei pawhin kan chawimawi loh chuan, khaw dang in an chawi mawi loh avang hian vui thei kan ni lovang.

    No comments

    Post Top Ad

    Post Bottom Ad