• Breaking News

    Chapchap Kut Committee, Press Tour Report, etc.

    Kolasib-ah  NGO  tel  lovin Chapchar  Kut  Committee

    Kolasib-a Chapchar Kut hman dan tur relna nimina DC Conference Hall-a neih ah NGO hrang hrang te an tel lo a; NGO tellovin Kut hman dan tur rel a ni. Thudawnna in a sawi angin Kut Committee hi Kolasib DC Dr Arun T. hova neih tura ruahman a ni a; mahse NGO Coordination Committee chuan DC telna Meeting-ah NGO anga tel tawh loh an rel avangin NGO te hian an tel tum lo a; hei vang hian Pu Laltanpuia Hnamte Addl DC chuan Celebration Committee a kaihruai a; mahse NGO te an tello tluan ta zawk a ni.

    Kolasib-ah chuan Pu K Lalrinliana Minister chu Kut Pa tura sawm a ni a. Chapchar Kut Working Committee din a ni a; he Committee hi NGO lamin an kaihruai thung ang.

    Vawiin hian nimin thurel bawhzuiin Working Committee chu NGOs te nen DAO Office an thukhawm leh dawn a ni.


    Press  Tour  Report  an  pe

    Nimin khan Aizawl Press Club ah Mizoram sorkar buatsaih, Press Study Tour State hrang hrang pali-a kal Team hrang hrangte hnen atangin report ngaihthlak a ni a. Pu Lalruatkima I&PR Minister leh I & PR Department Officer te leh MJA hruaitu leh member ten he programme hi an hmanpui.

    Press mi te hi Nagaland, Kolkata, Sikkim leh Meghalaya ah hlawm hrang hrangin an kal a. An kalna State atanga zir tur kan neih te an sawi lang bawk.

    Pu Lalruatkima Minister Journalist te hamthatna tur leh pension chungchangte siam turin sorkar a inbuatsaih tih leh MJA Welfare Board atan MJA leh sorkar lam pawh an inruat fel tawh tih sawiin Tourism Industry chungchangah uar zawka mipuite hnena zirtirna pe turin a chah a, NEIGHRIMS Shillong-a khualbuk hmunhma pawh a theih anga hmalak a nih tur thu te, chanchinbumite chu sorkar fin chhuah zel tur leh sorkar nena thawhhona tha tak nei zel turin a sawm a ni.


    Education  Minister-in  puhna  sawifiah

    Education Minister Pu Lalchhandama Ralte chuan ‘Zirtirtu indaihloh zual bikna lai-ah MR / Contract thawktu tur Zirtirtu lak tum mek chu MPSC thuneihna chuh sak tumna a ni lo a; MPSC chuan hna nghet tur a la thin a; tuna Zirtirtu rawih tur te hi chu a nghet lo vek an ni’ tiin Eptu Party thenkhat in MPSC thuneihna chuh sak tum anga an sawi chu a thusawi an lak kawih vang mai mai a ni a, mi thenkhat fuih pawrh an tum mek a ni tiin nimina MNF Party Office Hnam Run-a Party Chhung Inkhawm ah a sawi. Minister chuan Sawrkar hmasa khan a ngaihtuah tawk loh avangin Zirtirtu hna ruak 2300 ngawt a awm a; hmun thenkhat ah chuan an indaihlo hle niin a sawi.

    Minister chuan MR / Contract Teacher lak tur zingah hian School awmna khua-a awm nghet te lak an nih theih nan sawrkar in ruahmanna a siam mek niin a sawi a. "MNF High Command-in a lo passed tawh ang leh SEDP-ah pawh kan ziak angin, kan ram, hnam leh sakhua mil thei ang bera School Timing tidanglam tura ruahman a ni" a ti bawk.


    PRISM-in  PIL  thehluh  rel

    PRISM Party chuan Mizoram sawrkar-a Adviser to Chief Minister in Minister of State rank a nei chu dan kalh a ni tiin High Court ah PIL theh luh mai nise tiin an rel. PRISM President chuan ‘Minister of State Rank inpek hi India danpui kalh anih bakah tul lova mipui sum senna leh Nuai tam tak kal ralna tur a ni a. PRISM-in kan dodal avanga ban tak Parliamentary Secretary-te angah khan ngaiin an siam tha a nih loh chuan High Court-a PIL theh luh kan tum a ni’ a ti. Tun hnai-ah Mizoram sawrkar chuan Pu C Lalramzauva chu Adviser to Chief Minister atan a ruat a. Minister of State rank leh entitlement an pe a; hei hi PRISM chuan diklo a ti a ni.

    Chawl rih

    PMUY hnuaia Gas free connection Mizofed Kolasib-in an kalpui mek chu an chawl lailawk rih niin thudawn a ni a. Kar kalta tir lam khan gas connection hi  42 an pechhuak a ni. Hetihlai hian Dilna erawh thehluh theih reng a ni.

    Hun hawng
    Govt. Kolasib College a IGNOU Centre a\anga December 2017 & June 2018 a pass chhuak tawh, Certificate la dawng si lo te tan dilna hun hawn a ni.

    VC Award
    VC-III Kawnpui te chuan Kumin kumtawp lamah Naupang, Thalai leh Veteran te pualin Infiamna Kutpui neih nise a ti a. Thalaite tana Infiamna Court thar 3 siam lawmna a ni nghal ang.

    Hei bakah hian kumin Board Exam-a hlawhtlinna changte Chawimawina neih a tum a, a ti \ha ber hnenah VC Award pek a tum bawk a ni.

    No comments

    Post Top Ad

    Post Bottom Ad