• Breaking News

    Career Guidance

    Zirlaite hnenah hma lam thlirna (Career Guidance) neih hi kan ching ta lo riau mai a. Kum 5 hma lamah kha chuan Zirlai Pawl emaw School mal angin emaw buatsaih a ni thin a. Tunah chuan a reh ta viau mai. Green Hills High School in hmanni lawkah mithiam sawmin an buatsaih tih kan hria a; a tuk maiah a hlawhtlinna hmuh tur awm nghal lo mahse kum 10 lokal tur atana thil pawimawh anih avangin chutih hunah chuan Zirlaiten an tangkaipui ngei ang.

    School lama Zirtirtu thenkhat phei chuan Career Guidance chungchang hi Zirlaite hnena sawi tur pawh an hre lo. An chhiar peih bawk si lo a; an Student te chuan hre lo mahse pawi an tih vak hmel loh bawk a. Tumna an nei tlem em em a ni.

    Zirlaite hmakhua thlirna hi pawimawh tak a ni. Anmahni Zirlaite chuan an dinhmun atangin eng mah hma lam an thlir thiam lo ang. Puitling zawk ten kan thlir tur a ni a. Kan kawhhmuh tur a ni bawk. Khawhmuh dan tur hre turin keini pawhin kan chhiar a; hriat kan tum a ngai.

    Thawk khat lai khan Zirlaiten an School chanchin an sawi chu ‘thil nuihzatthlak’ lam te; an Zirtirtu pakhat thil tih dan te; Zirtirtu kal tlai thin te a ni deuh a. Hmasawnna tur a awm lo hle. An zirlai emaw, Homework emaw, zirlai kaihhnawih sawi tur an hre ngai lo. Chu chuan naupang a kaihruai sual nasa hle ang.

    Tuna BA leh MA Pass thar rawn chhuak mek te zingah School an kal laia Career Guidance dawng tha chu an danglam in an rilru pawh a dang daih mai a. Mahse Career Guidance dawng tha lo erawh chu Exam-a pass vangin Degree nei ve bawk mahse hmathlir an nei thiam lo a; tumna pawh an nei tam lo. Hna an beisei ngam tawk chu Party hruaitu leh Minister ten an tihpui theih chin, hna hniam te te, a nghet lo lehnghal a ni deuh mai. Career Guidance dawng tha chu chutiang level ah chuan an cheng ve lo a; han thlir mai pawhin an danglam bik.

    Vawiina School Zirtirtu te hian Student te hnenah sawi tur kan hre lo anih chuan kan Zirlaite puitlin hun tur a ngaihtuahawm ngawt ang. Kum tawp-ah an Exam ang a; an Pass ve mai thei. Mahse tumna an neih loh chuan an Passed chhuah hnu-ah tih tur an hre dawn chuang lo. Chu chu vawiinah pawh hian BA passed tawh zing atangin kan hmu tan tawh a ni.

    Zirlaibu by-hearth ringawt hi tu te pawhin an thei mai a. Mahse an hmakhua thlir sak thiam dan ngaihtuahin Career Guidance lam hi kan uar thar leh tur a ni. Tunah hian Mizo ten kan tuar tan mek tawh a; kum 10 a lo ral leh chuan vawiin ai hian Mizoram in a tuar tawh zawk ang.

    No comments

    Post Top Ad

    Post Bottom Ad