• Breaking News

    Aizawl atangin Zokhawsang-ah Assam Riffles; May thla ral hmaa insawn chhuak tura hriattir an ni

    Union Home Ministry chuan Mizoram Assam Rifles te chu kumin May thla ral hma-a an hmun tur Zokhawsang-a insawn chhuak vek turin hriattirna a ti chhuak a; AR hotute chu insawn tura an hmalakna report thin turin a hriattir bawk.

    Nimina MNF Party Chhung Inkhawm-ah Pu Lalruatkima Minister chuan ‘Assam Rifles insawn chhuak tura tihna hi ni 13.10.2007 khan tihfel tawh a lo ni a, hmalatu ber MNF sorkar a tlak tak avang khan tumah bawhzuitu an awm ta lova, sum pawh cheng vaibelchhe 117 zet sanction a lo ni tawh nghe nghe a ni. Khatih lai atang tawh khan Assam Rifles hmun hi mimal ram atana sem hlauhthawnna mipuiah a lo awm tawh a, chumi hma daihin MNF Ministry khan hmathlir thui tak lo neiin a venna tur dan 'Restriction of Tranfer of Land' dan a lo siam fel dim diam tawh a, mimalah ram pek a ni dawn lova, sorkar ramah dah vek a ni dawn a ni’ a ti.

    Mizoram sorkarin AR hnenah hian August 21, 2006 khan kum 99 chhung atan Zokhawsangah ram Acre 1305.15-a zau a lo pe tawh a;  Sawrkar leh AR hian MoU an lo ziak fel tawh nghe nghe. MoU-ah chuan AR ram chhuahsan chu Official thila hman tur ni lovin mipui tan chauha hman tur a ni ang a; AR rama mimal LSC-te chu Mizoram sorkar cancel tura dah a ni a, ‘LSC cancel chungchanga harsatna a awm chuan Mizoram sorkar mawhphurhna tur a ni ang’ tia dah a ni.

    Kum 2014 khan Revenue Deptt hotute chuan AR leh Mizoram sawrkar chuan insawnchhuak tura inremna turin hma an la tih an sawi a; mahse sawrkar chuan hmanhmawh takin thil a ti dawn rih lo niin Media-ah tarlan a lo ni tawh a. Inremna an siam turah pawh AR ram luah chin zawng zawng ni lovin Sipai ten an chhuahsan tur leh an luah zui tur te pawh kum 2014 hian thliar hran deuh a ni nghe nghe.

    Mahse Dt 19.Feb.2019 a Union Home Ministry Order-ah chuan Assam Rifles te chu May ni 31, 2019 ral hma-a insawn chhuak tura tih an ni mai a. Thudang delhkilh engmah ziah tel a ni lo.

    No comments

    Post Top Ad

    Post Bottom Ad