• Breaking News

    Aiawh kaltir

    Congress Party in Sawrkarna a rawn chelh tirh 2008 khan Sawrkar hnathawk zinga aikal zawng zawng te titawp turin leh a thawktu ngei kal tawh turin thupek khauh tak mai a chhuah a. Damlohna te; harsatna bik vanga aikal tir te pawh khan Sawrkar thupek a awm chuan anmahni ngei an kal thei nameuh mai. Mahse thla eng emaw zat a lo liam a; mi tam tak chuan aikal an tir leh ta tho a.

    Tunah Sawrkar a inthlak a; Sawrkar hnathawk zingah aikal kal tir chu Sawrkar in tha a tih loh thu kan hre leh a; hnathawktu thenkhat pawh an insiam rem leh mek hlawm. Dik tak chuan Sawrkar in a hna thawk tura a lak leh tling a tih chu Appointment a pe a; appointment pawh nei ve lo ten chu hna an lo thawk chu a dik chiah lo deuh bawk a ni.

    Kawnpui-ah hian Sawrkar Pisa a awm ve nual a; Zirna School nen phei chuan 20 chuang daih a awm a; chung zingah chuan aikal awm miah lohna Pisa chu tlemte a ni a. Pisa thenkhat ah phei chuan aikal deuh vek an awm thung a. A pawi hle.

    Kum 10 liamta velah khan Kawnpui MZP te khan Kawnpui khaw chhunga aikal zawng zawng titawp a; anmahni ngei thawh tir turin Sawrkar ah a ngen a; kha ngenna kha Sawrkar pawhin a la thu tak hle a; Aikal tir zawng zawng pawhin an titawp hial a, anmahni ngei an kal ta a nih kha. Vawiin ah pawh hian MZP emaw hian hma la leh se thil tha zawk a chhuak thei mai thei.

    Sawrkar hnathawk ten midang an kal tir a, anni In lama an awm emaw hna dang an lo thawh hi Dan in a khap tlat a ni. Sawrkar tan pawh a him lo. Aikal te chuan Sawrkar lehkha leh thil pawimawh vawn that ngai te pawh an lo ti put chhuak thei a; Sawrkar an timualpho thei. Dan angin hremna an chungah lek dawn se, Conduct Rules ina phuar ve loh avangin hrem tak tak theih an ni si lo.

    Sawrkar lehkha pawimawh te; Sawrkar thuruk niawm tak Social Media lama lo put chhuak leh zauh thin pawh hi aikal te atanga chhuak a awm nual tawh a ni. Anni tan chuan action lak kha chuti takin hlauhawm ve hek lo. Chuvangin Sawrkar Pisa-a aikal kal tir hi Security thilah pawh a him tawk lo hrim hrim a ni.

    Kawnpui-a Sawrkar Pisa zawng zawng te hi han thlir kual ila;aikal tute nge kal tih list siam chhuak ta ila; damlohna danglam bik vanga aikal tirh ni lo pawh an awm nualin a rinawm. Chutiang mite chu ngai mawh ta ila; tun ai hian kan Office kalphung hi a mumal deuh zawk in a rinawm.

    Mipuite hian kan thlir liam lutuk deuh a; Sawrkar Pisa lama thawkte an inthlahdah deuh ta niin a lang. Chuvangin mipui emaw eng Pawl emaw hian Sawrkar Pisa mumal taka a kal theih dan tur hi rawn ngaihtuah se la; aikal te titawpin anmahni ngei in Pisa rawn kal se hna an thiam zawk ang a; mipui pawhin kan duh zawkin a rinawm.

    No comments

    Post Top Ad

    Post Bottom Ad